PAGTUON SA PAGHIGUGMA

PAGTUON SA PAGHIGUGMA

1 Corinto 13

PANGABLI NGA HUNAHUNA

Ang gugma mao ang bunga sa Espiritu Santo sa atong kinabuhi.

Ang nabantug nga “love passage” nga gibasa sa kadaghanan nga mga kasal, 1 Corinto 13 makatabang kanato sa pagsabut kon unsa ang gugma ug unsa ang dagway niini sa matag adlaw nga pagkinabuhi. Daghan ang nagingon nga kini mao ang labing daku, labing kusganon, ug labing halalum nga pamahayag sa mga nasulat ni Pablo. Kining corona nga alahas sa Biblia nagpalig¬on sa kamatuoran nga ang gugma dili una sa tanan usa ka pagbati kondili usa ka kalihokan. Ang matang sa gugma nga ikaw ug ako gitawag sa pagkinabuhi kinahanglan makita ug masinatian.

I. Sabta nga Ang Gugma Mao ang Bunga sa Espiritu Santo (Gal. 5:16¬26).

A. Ang Biblia nagtudlo kanato nga ang gugma maoy usa ka butang nga atong magamhan. Kinahanglan kini manginlabut sa atong pagkinabuhi. Bunga kini sa kinabuhi nga puno sa Espiritu. Ang gugma nga dad-on sa Espiritu Santo nganhi sa atong mga kinabuhi usa ka langyaw sa natural nga kasingkasing sa tawo. Dili kita niini nga gugma kondili makatugot lang niini sa pagtubo sa atong mga kinabuhi. Dili kita makapili sa pagkalabi pang mahigugmaon o labi pa ka malipayon o labi pa ka malinawon ug kalit lang kita mahimo sama niini! Ang bunga dili usa ka butang nga atong mabuhat; mao kini ang atong ikapakita. Ang bunga sa Espiritu dili mapakita bulag kang Cristo. Kon suod ako kang Cristo, dagaya ang bunga sa Espiritu nga mo-agay pinaagi sa akong kinabuhi.

B. Ang Bunga sa Espiritu usa ka nalangkub nga pagpadayag. Ang Bunga sa Espiritu mao ang gugma ug ang uban nga walo ka mga bahin mao lamang ang mga paagi nga mapadayag ang gugma. Ang Galacia 5:14 nagingon, “Ang tibook kasugoan gilangkub sa usa ka kamandoan: “Higugmaa ang imong silingan ingon sa imong kaugalingon.”

II. Sabta nga Ang Gugma Labaw sa Tanang Butang.

A. Bisan unsa ang akong buhaton ug isulti walay pulos kon walay gugma. Sa bersicubo 1, si Pablo nagingon nga bisan siya magasulti sa daghang mga dila ug makahiino sa pagsulti sa langitnong pinulongan sa mga manolonda, apan walay gugma, mahisama lang siya sa tumbaga nga nagatunog, kun piyangpiyang nga nagatagingting.

B. Sa bersiculo 2 si Pablo nagingon nga ang gugma labaw pa ka hinungdanon kay sa kahibalo. Bisan kon nahibalo kita sa tanang butang bahin sa nuclear science, medicina, pilosopiya, psycolohiya, ug teolohiya apan walay gugma, wala kitay kapuslanan.

C. Daw dili katuohan, si Pablo nagsulti nga ang gugma labaw pa ka mahinungdanon kay sa pagtoo, kay kita nahibalo nga ang Hebreohanon 11:6 nagsulti nga, “kon walay pagtoo dili mahimo ang pagpahimuot sa Dios.” Ang iyang gipasabut mao nga ang gugma labaw sa tanang butang “Kon ako adunay pagtoo sa pagkaagi nga akong mabalhin ang kabukiran, apan walay gugma, ako walay Pulos.”

D. Ang gugma labaw pa gani kay sa pagkamanggihatagon ug sa paghalad: “Bisan akong ihatag ang tanan kong kabtangan ngadto sa mga kabus ug akong itugyan ang akong lawas ngadto sa mga siga sa kalayo, apan walay gugma, ako walay pulos.”

II. Ang Gugma Kinahanglan Makita sa Atong mga Kinabuhi.

A. Bisan og ang gugma labaw sa tanan, sa mga bersiculo 4-7, si Pablo naghagit kanato sa pagkinabuhi niini. Dili igo ang pagila nga ang gugma kinahanglanon; kita gitawag sa pagpakita sa agape nga gugma sa atong kinabuhi. Sa Juan 13:34, si Jesus naghagit kanato, “Nagahatag ako kaninyo og usa ka bag-ong sugo: Maghigugmaay kamo sa usa ug usa. Maingon nga ako nagahigugma kaninyo, busa kinahanglan maghigugmaay kamo sa usa ug usa.” Dili kini usa ka sugyot kondili usa ka kamandoan.

B. Mga bersiculo 4-7: “Ang gugma mapailubon, ug mapuangoron; ang gugma dili masina; ang gugma dili andakan sa iyang kaugalingon, ang gugma dili moburot ang gugma dili magagawi ug kalaw-ayan, dili magapangita sa iyang kaugalingon, dili masuk-anon, dili magtagad sa dautan. Ang gugma dili magakalipay sa pagkadili matarung, kondili nagakalipay uban sa kamatuoran; nagapas-an sa tanang mga butang; nagalaum sa tanang mga butang; nagaantus sa tanang mga butang.” Asa niini nga mga bunga ang makita sa atong mga kinabuhi?

C. Ang gugma dili makita sa atong mga kinabuhi, gawas kon si Jesus ania sa atong mga kasingkasing. Bunga kini sa buhat sa Balaang Espiritu. Kon labi kita ka suod kang Jesus, magadagaya ang gugma nga mapadayag sa atong mga kasingkasing.

IV. Panapus

Ang bunga sa gugma kinahanglan pagahandumon ug ipakita sa matag Cristohanon. Sa baylo nga mabalaka kon unsa ang mga gasa nga espirituhanon nga akong nabatonan; sa baylo nga ako mabalaka bahin sa akong pangatungdanan sa iglesia o sa pagtutok sa pagbaton sa salapi o kalingawan, kinahanglan akong sigurohon nga ako mahimong usa ka tawo nga mahigugma. Ako ba gitagad ang ubang tawo uban sa gugma sama sa gipakita sa Dios kanako?